Extrait d'émissions

Emission1

TEM: SIDA
SIJE: STIGMATIZASYON

Premye pati

Naratè 1 Zanmi k ap koute nou, bonjou. Nou kontan jodi a pou n rankontre pou yon lòt emisyon Pawòl timoun. Sa k pase Kensly, n ap boule? M kwè w deja pare pou emisyon an.

Naratè 2 Menwi Lumencie, nan emisyon jodi a n a va pale sou SIDA, sitou nan sa ki konsènen stigmatizasyon an.

Naratè 1 Dakò Kensly, ou konnen jodi a stigmatizasyon ap vale teren, li menm tounen yon pwoblèm pou moun ki enfekte yo. Sa ou di Kensly ?

Naratè 2 Wi Lumencie yo konsidere stigmatizasyon an kòm yon mak yo mete sou do moun ki enfekte a pou yo imilye l, fè l pèdi tout valè li. Moun sa a, yo pa gade li menmjan ak fason yo te wè li avan li te enfekte a. Tout sa se mepri lèzòm.

Naratè 1 Nan emisyon nou jodi a, n ap genyen pou n pale sou sa ki stigmatizasyon an atravè yon ti istwa.

Dezyèm pati

Naratè 1: Nou pral koute yon ti istwa sou yon elèv lekòl ki enfekte ak viris SIDA ; malgre eta fizik li, li toujou djanm.

Naratè Vwala, se te istwa Jan Lik, yon elèv lekòl ki t ap bese leve akoz eta sante l pat bon. Aprè yon tès depistaj VIH-SIDA nan lopital la, yo dekouvri li pote viris ki bay maladi SIDA nan san l . Yon lè koze a rive nan direksyon lekòl la, etan yon gwo diskisyon te pete ant Jan Lik ak yon gwoup elèv. Paran mete bouch, koze a rive menm nan vwazinaj lakay, lajistis te mele tou.

Janèt Ey! Kote madan Ednè, ou pa tande yo pran !

Madan Ednè Sa fi sa gen, l ap fè bri, epi kèl kontan konsa ?

Janèt Ou tande koze ya ? Jan Lik pran SIDA. !

Madan Ednè Sa l ye ? Chita pitit, kote ou jwenn koze sa-a ?

Janèt Madanm, se talè ya m sot tande Jan Lik k ap di manman li sa paske koze sa-a kòmanse fè zen nan lakou lekòl mèt Jozèf la.

Madan Ednè An an, se konsa, timoun mwen yo te konn al jwe lòtbò a, m p ap kite yo ale ankò, pou yo pa pran SIDA.

Janèt W ap pale, kite koze pran pawòl ! Fò n al pale direktè ya pou l pa resevwa sidayis nan lekòl li.

Naratè listwa Konsa yo imilye Jan Lik, yo mete l sou kote. Li pa t pote l byen ditou, li te gen anpil move panse nan tèt li, manman l t ap pale ak li.

M Jan Lik Jan Lik cheri pale manman w sa ou genyen non, m pa konprann ou menm ?

Jan Lik Bon men li manman, sa pou m fè ? men m al lopital jodi a ankò ak matant mwen Sofya, yo di l se maladi SIDA a k ap trakase m konsa, se pou yo pran swen m epi tann sa k ap vini pou pita.

M. Jan Lik Ou retounen ak pawòl SIDA sa a ankò ? Kote m te voye w ? Se gwo lajan m depanse pou voye w lekòl ! Gade kote w ale met tèt ou.

Jan Lik M pat konnen si m t ap rive la. Tout moun nan kò m kounye a ; menm Janèt ak madan Ednè ap mache fè moun pou mwen ; menm nan lakou lekòl la yo kòmanse rizibye m, direktè a voye m retounen lakay, timoun yo ap rele m sidayis. Pou m ta pi byen se pou m ta bay tout moun sa yo k ap imilye m nan maladi a !

Naratè listwa Pandan tan sa-a, Janèt t ap koute, diskisyon mete pye, se jij Panyòl ki t ap pase, ki te vin mete lapè.

Janèt Sa w di Jan Lik ? se mwen ou akize k ap fè moun pou ou?

M Jan Lik Wi Janèt, ou fè sa vre, se ou k ap fè moun nan lari a pou pitit mwen an.

Janèt Ki moun ki di w se mwen k ap mache fè moun pou pitit ou nan lari a?

Jij Panyòl Mezanmi, sa nou gen la konsa, nou fè twòp bri la, sa nou genyen menm ?

M Jan Lik Non jij, m tande Janèt ap mache fè moun pou pitit mwen li di ki gen SIDA.

Janèt Non jij, etan m ap pase m tande Jan Lik di fò l banm SIDA.

Jij Panyòl Mezanmi antann nou, menm lè yon moun gen maladi SIDA, se pa pou n imilye l ni mete l sou kote, nou dwe toujou konsidere l menm jan ak lè li pa t ko malad.

Janèt Mwen jij, pou m byen di w se man Ednè ki te vin di m sa. Si m te konnen m pat mele nan koze sa a. M menm tande direktè a retire Jan Lik nan lekòl la twòp eskandal.

M Jan Lik Janèt, mwen vle padone w, men pa mete bouch ou nan koze sa a ankò.

Janèt Dakò man Jan Fis, o kontrè m ap ede ou ak Jan Lik.

Twazyèm pati

Naratè 1 Peyi dayiti se youn nan peyi karayib yo, kote kantite moun ki gen viris SIDA vin pi plis chak jou. Chak ane anviwon 4 mil timoun ki fenk fèt, pote Viris SIDA nan san yo. Preske 2/3 moun k ap viv nan karayib la soti nan peyi nou, an Ayiti. ( enfòmasyon nou jwenn nan rezime dokiman 2 mil sis, CECOSIDA mete deyò).
Plis maladi SIDA ap fè pale de li, plis moun dwe fè efò pou yo pa imilye yo.

ANIMATE Se pou nou fè jefò pou nou pa meprize moun ki gen Viris SIDA nan san yo paske n ap fè yo vini pi mal.

Naratè 1 Zanmi oditè se la nou mete fen nan emisyon jodi a

Naratè 1 Nou kwè, aprè emisyon an nou tout wè li enpòtan pou n konpòte n byen ak moun ki enfekte yo, pou n ankadre yo, pale ak yo byen, konsa yo va santi yo nan sosyete ya tou.

Naratè 2 Nou remèsye tout moun ki t ap koute nou nan emisyon pawòl timoun.

Naratè 1 Nan mikwo a, moun ki t ap sèvi n se te : Lumencie Jose-Gardie Orphilien ak Flecher Kensly.

Naratè 2 Randevou a kase pou yon lòt emisyon. Orevwa.